Höfundur: Gísli Ásgeirsson
„Þær vita ekki betur. Femínistar ættu miklu frekar að vera að pönkast í körlum en kynsystrum sínum og hætta að gera lítið úr áhugamálum vinkvenna sinna. Karlmenn ráðast ekki á áhugamál kynbræðra sinna og kannski er það þess vegna sem þeir eru í sterkari stöðu á ýmsum sviðum. Þeir standa alltaf saman – á sumum sviðum þurfum við að læra þá samstöðu,“ segir Marta María en kvartar þó ekki.
„Að ráðast á aðra með öfgum er leið minnihlutahóps til að fá athygli. Ég yrði ekki fyrir barðinu á þessum hópi ef enginn læsi vefinn. Með allan þennan lestur væri eitthvað skrítið ef enginn myndi gagnrýna.“
Þetta er bútur úr löngu viðtali DV við ritstýru Smartlands á mbl.is. Þar er víða komið við en þessi hluti sem hér er vitnað til að ofan, þótti bitastæðastur að mati ritstjórnar blaðsins til að vekja athygli og á forsíðunni er fyrirsögnin: Femínistar vita ekki betur.
Halda mætti í fljótu bragði að þarna væri á ferðinni mikil og ítarleg gagnrýni á femínista og málflutning þeirra. Svo er ekki. Þetta er yfirgripsmikið og fróðlegt viðtal um heima og geima og það er því illa gert gagnvart viðmælandanum að gera þennan litla bút að aðalatriði. En þetta er engin tilviljun. Sumum fjölmiðlum þykir gaman að etja fólki saman, efna til skotgrafahernaðar sem fjölgar vefheimsóknum og athugasemdum en svona orðaskak endar alltaf í karpi um smáatriði og þátttakendur sjá oftar en ekki eftir tímanum sem í þetta fór.
Hér rær DV á gamalkunnug mið sem Mogglingar fundu á sínum tíma, eins og rifjað er upp í þessari grein: Öfgafemínisminn nemur land. Þar segir:
„.... varð vinsælt hjá ákveðnum hópi bloggara með athyglissýki á byrjunarstigi að hnýta í femínista og konur með skoðanir. Tilgangurinn var annars vegar að snapa undirtektir skoðanasystkina sinna en hins vegar að ögra og fá viðbrögð frá þeim sem ofbauð. Fyrrnefndi hópurinn var nokkur stór og meinfýsinn en hinir sem svöruðu og reyndu málefnalega orðræðu, gáfust oftast upp á því.“
Margt er annars við þennan viðtalsbút að athuga. Fullyrðingar úr honum hér á eftir eru feitletraðar til hægðarauka fyrir lesendur.
„Vanþekking stýrir umræðunni því mikið af þessum konum er svo ungir femínistar.“
Femínismi er hugmyndafræði. Ekki áhugamál. „Femínisti er manneskja sem hefur áttað sig á því að jafnrétti kynjanna er ekki náð og vill gera eitthvað til að breyta því.“ Femínistar eru konur og karlar á öllum aldri. Ekkert jafnaðarmerki er milli æsku og vanþekkingar. Ritstýra Smartlands er 35 ára kona. Sá sem þetta ritar er 56 ára karl.
„Það er betra að kynna sér málin áður en einhverju er varpað fram.“
Hér er væntanlega vísað til gagnrýni sem fram kom á bloggsíðunni Líkamsvirðing sem hýst er á eyjan.is og tóku nokkrir undir þá gagnrýni og sendu Smartlandi bréf. Um þetta er nánar fjallað hér: http://blog.eyjan.is/likamsvirding/2011/10/13/latum-verkin-tala/ . Ekki verður annað séð en þeir sem þarna tjá sig, byggi á rökum og málefnalegum forsendum. Ofmælt er að ætla öllum femínistum þessa gagnrýni.
„Femínistar ættu að hætta að gera lítið úr áhugamálum vinkvenna sinna.“
Konum ber engin skylda til að vera sammála um allt og sýna samstöðu á öllum sviðum, án tillits til málstaðar, málefnis og forsendna. Karlmenn gera þetta ekki og raunar er mikil einföldun að kljúfa kynin svona í sundur. Femínistar (konur og karlar) hafa hingað til gagnrýnt ranghugmyndir, firrur, misskilning og almennt bull, án tillits til kyns þeirra sem setja þetta fram.
„Karlmenn ráðast ekki á áhugamál kynbræðra sinna.“
Karlmenn gagnrýna hverjir aðra daglega og geta deilt, þrætt og rifist um allt milli himins og jarðar, eins og fólk gerir almennt. Skoðanaskipti og ágreiningur er ekki kynbundið fyrirbæri eins og blasir við daglega í flestum fjölmiðlum, þó einna mest á netinu. Fólk hefur ólíkar skoðanir.
„Að ráðast á aðra með öfgum er leið minnihlutahóps til að fá athygli.“
Gagnrýni femínista er víðtæk og þegar andstæðinga þeirra þrýtur svör og rök er auðvelt að grípa til stimplanna eineltis og öfga. Eins og fram kemur í grein Hildar Knútsdóttur um ritskoðun, eru þeir líka til sem eyða markvisst neikvæðum athugasemdum, loka á athugasemdir ákveðinna einstaklinga og reyna markvisst að stýra umræðunni til að gefa sem jákvæðasta mynd af sjálfum sér.
Þau ummæli sem vitnað er til hér í upphafi sýna að þeir sem tala svona skilja ekki meðvirkni sína gagnvart ríkjandi kerfi og gera sér heldur ekki grein fyrir þegar þetta sama kerfi beitir skilningsleysi þeirra sem vopni gegn femínistum. Þessi meinti femínismi er eins konar Best Of femínismi þar sem nýtt er allt sem hefur áunnist í kynjabaráttunni en ýtt um leið undir útlitskúgun og aðrar þrálátar hugmyndir um hvernig konur eiga að vera til að koma sér áfram með velþóknun þeirra sem hafa völdin.
Gagnrýni og umræða er af hinu góða, einkum þegar hægt er að horfa á skoðanir, án þess að einblína á hverjir setja þær fram. Að fara í manninn en ekki boltann á að einskorðast við boltaíþróttir. Það er frekar ódýrt að skammast bara í þeim sem setja fram gagnrýni, án þess að ræða hana málefnalega og saka aðra um vanþekkingu, án þess að útskýra það nánar.
Höfundur: Gísli Ásgeirsson
